Hasurbankuḍi

Sirma re enić ge Siṅgbonga.

Akin Kulabuṛia kin kapajitana.

Sida Biam sida Sangain...

Samaom Sataraṅ re Siṅgbonga duṕakanać, Samaom Taĩṛi Danḍaḱ.

Imitaṅkin kapajitana...

Pati Peṭé peṭétekoa, mimiat́ Miw miwtekoa.

Ranki Gunḍi Piuri Gai kin arajitana Siṅgboṅga taḱ: Upalbah Pukuri, Taṛaebah Bandela ḍunḍaḱtana. Chara kaliṅ namyat́a, Siṅg Sadam, Tasat́-ruṛaḱ saben rongotana. Muć-Pipiṛi, Charai-Chuguni Daḱ kakô namyat́a, Chara kakô namyat́a.

Sirama re Siṅgbongać elaṅtana ayurtana.

Samaom Satarangi re duṕakan aeteć ayumtana; rakińyanać.

Kacha-kanḍayanać, ṭunṭa-pirinyanać: Hasurhonko, maḱgiṛikôań.

Ente Kuṛi kajivaćtana: Alamà! Esakar ge kam daṛiakoa, sangeakô Haga, sangeakô Boóya. Enko Nidaókô siput́tana singiókô siput́tana. Am dom esakargêa; Mapaḱ Tupuń te kam daṛivakôa. Gelea Bidu, Hisia Chayakoć metat́ića. Hémarket́ać.

Enate Dingchua Maru ente Kerkeṭa Jagukineć kuldutamket́kina Hasurhonko taḱ.

Enkin kajiyat́a: Kaji chaliṅ agutat́a, Bakãṛã chaliṅ seṭertat́a. Nidape siput́ redo singi alapeà! Singi dope siput́ redo nida alopeà! Upalbah Pukuri Taṛaebah Bandela anjet́tana ḍunḍaḱtana. Ranki Gunḍi Piuri Gai Daḱ kakin namyat́a, Chara kakin nam eada mentekin kajitana. Muć-Ṭonṭo, Charai- Chunguni Daḱ kakô namyat́a, Chara kakô namyat́a. Ote re Tasat́-Ruṛaḱ, Sing-Sandom saben rongotana. Sirma re Siṅgbongać elaṅtanać aiurtana.

En Hasurhonko kajiket́a: Ale Siṅgbongatelea, ale maraṅ Deotatelea, jetaićaḱ Kaji kale manatiṅa.

Ale ge aṅ maraṅakana, ale ge tur maraṅakana. Ale aete jetaić maraṅ baṅaća. Nida óle siput́a, singióle siput́a -mentekô kaji ruṛakintana. Kadal-kandile kandiakana, Jumbuli-juṛile juṛiakana. Ḍunḍa Pálle kiduṕtana, ḍunḍa Pálle angaratana, ale jetaćaḱ Kaji kale manatiṅa -mentekô kajiket́a.

Dingchua Kuila Duṛa tekô herket́ića, Kerkeṭa Bicha Duṛa tekô herket́ića.

"Jú senoḱben! Okoć taḱ reben uduṕea!"

Enkin senoḱyana, Siṅgbonga taḱ rekin uduṕ eada: "Hela Gomke! aliṅ do Jatikô at́ ichiket́liṅa!"

'Senoḱben abenaḱ Jati taḱ te; sabenko mit́ gepe neloḱa'ć kajiyat́kina.

Entekin senoḱyana at́kin nelket́koa, mit́ geako.

Ente Sonadidi Rupadidi ć kulket́kina. Enkin Hasurhon kokin kajiakotana: Kaji chaliṅ agu tat́a, Bakãṛã chaliṅ seṭer tat́a.

Ente Koṭasi tekô maraket́kina, ente Sanḍasom tekô maraket́kina. 

Jú senben! Okoć taḱ reben uduṕea nahḱ do mentekô kajiat́kina. 

Ente Lipi Susari, Káḱ Banḍari enkineć kulket́kina Hasurhonko taḱ. Ente enkin hućoḱ lena anḍoḱkin kajiakôtana: Kaji chaliṅ....

Ente Káḱ Kuila Duṛa tekô herket́ića, Lipi Bicha Duṛa tekô herket́ića.

Ente Laṅ Chẽṛẽ Bocho Chẽṛẽ ć kul dutamket́kina......

Bocho Chẽe Sasaṅ Daḱ tekô hichirket́ića, Laṅ Chẽe Chat́lomkô tauć jiliṅket́ića.....

Ente Singhonga gelbar Bidu gelpé chayaket́kinać.

Ekasi Piṛi tirasi Badi Dasi Koṛa maḱ tan chaluḱtanać. Ente enre Siṅgbonga Kasrać herket́a enićaḱ 

Hoṛmo re. Ente enić gaoyanać. Gaoyan chi, Sona Richi sor idiket́ićać enić taḱ. 

Enteć metaćtana : Chi de! ań chaluḱea misa. Ente en kasraakanić kaji ruaṛaćtana: Ań do Kasra Gao te saben Kut́lam Harangi te ṭope chabaakana, am do nelekan parchi hoṛo kań emamea menteć kajiat́ića.

Ente Siṅgbonga enić ge Chuṭa Uṕ reć saṕket́ića at́eć sokoćket́ića. Hotoryanać. En Úr te Siṅgbonga sonoḱyanać. Enaàeteć senoḱyana Hasurhonko taḱ te. Huṛi Sakam teć jirenntana Rokoko har tan teaḱ. Pati Rokoko haryat́ića, pati Tijuko uiuiditana. 

Ente Hasurhon koaḱ Hatu ć tebaḱket́a. 

"Chi hale ! Dasipe riíkaà chi? Sim koń har nalhà." 

Ente Hasurko kajitana: 

Jú na Kuṛi ko! nelić pe. Enteko nelket́ića. Enateko nelket́ić chikô chíchíyat́a, durduryat́a, bećyat́a. "Kaleà, kale riíkaà Dasi. Honko tale chalàguoḱa, Gãṛako tale chalàguoḱa." Ente eṭaḱ Hatu teć senoḱyana.

"Chi hale! dasipe riíkaà chi!" Gãṛako tale chal aguoḱa. Jú senoḱ me! hansaḱ Ṭola te senoḱ me, Munḍa kin menaḱkina Luṭkum Haṛam Luṭkum Buḍia. Enkin asit́, Honko baṅkoa, ḍinḍa geakin. Ale do kaleà."

Ente enkin taḱć senoḱyana.

Chi hale! Jiaṅ kin Tataṅ kin, menaḱbena chi tabu.

Enkin Dasikinn rikaket́ića. Ente Sim koć har nalhtana.

Ente musiṅg hulaṅeć kajivakintana: Simjarom namvatukań pe, Gaooḱ te hayayat́ińa. Entekinn namtukavat́ića. Ente Hasurhonko taḱć senoḱyana. Enko loḱ inuṅ lagit́eć senoḱtana. Akoaḱ Meeht́guli, Kasrakoṛa'aḱ Simjaromguli. Hasurhonko kapajitana: Simjarom tać reput́eabu, lat́eabu. Mara oṛau mekô metaićtana. Oṛauket́ać. Ente enićaḱ Guli kako ṭoḱket́a. Ente, 'mar ape oṛau pe'ć menyat́a. Ente enić guliket́ać. Ente Simjaromguli te Meeht́guli koć ṭoka raput́ket́a. Ente enko ringĩṛiyana. Aurilê uduṕmea Luṭkumhaṛamtakin taḱ re! Baba do Paṭi rekinn tasitukavat́mea; Simko jom chabaket́akoć menyat́a.

Ente Haṛam-Buḍia taḱ re enkatêkô uduṕket́a. Buḍia kísioḱtana: Chenaḱlaṅ joóma! soben Simko jom chabaket́a. Ne Kasrakoṛa Dasi kalaṅ rikaićań metat́mea; rikaić gealaṅemm menket́a."

Miat́ Babajaṅ en Kasrakoṛa halaṅ ruaaket́ać. Paṭi reć emket́a, Paṭi perećyana; Oaḱ teć idiket́a. Sehl reć emket́a, Sehl perećyana. Ṭunki reć emket́a, Ṭunki perećyana. Haṭaḱ reć emket́a, Haṭaḱ perećyana.

Ente Haṛam-Buḍia kin nelket́a.

'Okoćaḱmm kumbuuket́a?' mentekinn kulićtana.

"Jetaćaḱ Jiaṅ kin Tataṅ kin kań kumbuu akat́a. Abuaḱ ge saṛatiṅtana baṛatiṅtana. Siṅbongać emabutana."

Ente onḍoḱ eṭaḱ hulaṅ: Aben hale! Jiaṅ kin Tataṅ kin Lupuḱlat́ baitukavań ben, Gao te hayayat́ińa menteć kajivakintana. Ente enkin Lupuḱlat́kinn baivat́ića. Ente Lupuḱlat́ saṕket́têć senoḱyana Hasurhonko taḱ inuṅ te.

Ente enko: Mara Lupuḱlat́ kati taa me, oṛau mekô metaićtana. Ente enko katiket́a, kako ṭoḱket́a. Mar nahḱ do, ape oṛauè peć metat́koa. Enteć katiket́a. Katiko tako raput́oḱtana, Meeht́katiko Lupuḱlat́kati te. Ente enko ringĩṛiyana.

Ente Hasurhonko Meeht́eć adit́ket́koa. Ente: 'Dea! Chaulijaṅ nelvale me Kasrakoṛa!'kô metaićtana.

'Duṕ ó kań daea, Gao hasuyat́ińa, chelekatêń nelvapea' menteć kaji ruaavat́koa. 'Ente Setaḱ hućoḱ peń uduṕvapea.'

Ente enko Setaḱkô sen ruaayana. Chia? 'Chelekatêm namket́a'kô kuliyat́ića.

Siṅbonga re Punḍisim bongaić pe, imitaṅtâpe meeht́oḱa.

...ká chabaakana.