Mí Ciput́ Manijaṅ

Kisá Gótami’aḱ miat́ ge Hon, goć ynać. Hambal Jiv te goćakan Hon koyoṅ akaaiy te Oaḱ-Oaḱ’ć nir tana, Reht́-Ranu asi, hooko men ket́a, «Bayaoḱ tanać. Hon goć sekaa ynać.»

Tayom, Kisá Gótami nam ket́ić miat́ hoo kajivaiy tana, «Hon reht́ do kań reht́ daivaiya, reht́ dai EmReht́ miat́’ń nutumvamea.»

Ente Kui kuli ket́ica, «Uduṕvaińme, okoe?» En hoo kaji uraa ket́a, «Sákyamuni taḱ senoḱ me, Evnakanić ać.»

Kisá Gótami Evnakanić taḱ senoḱ yn teć raḱ tana, «Gomke Gusĩa, Hon tań jivt́ uraaiy Reht́ emvaiń me.»

Evnakanić kaji ket́a, «Mí Ciput́ Manijaṅ aguvaiń me.» Rãasa te en Kui aguvameań menteć kaji ket́ re, Evnakanić kaji onḍoḱ ket́a, «En Manijaṅ mendo, Hon· Koa· Enga· Apu· Juḍi jahć kako goć akan Oaḱ aete ague me.»

Kisá Gótami bapui Oaḱ-Oaḱ’ć nir tana, hooko uṛuḱ teko men, «Nè, Manijaṅ; idie me!» «Hon· Enga· Apu jahć reó ape Oaḱ reko goć akana ci?» -menteć kuli ket́ko re mendo, «Enado na! Jivt́ akanko huḍiṅa, goć akanko ge lahḱ do. Ale Jiv ikir reaḱ hambal balae alam honḍanamvalea.» menteko kaji ket́a. Jahn Oaḱ ge banoḱa, Oaḱ ren hoo kać goć akan te.

Kisá Gótami langa ynać, Jiv tać nubaḱ yna, Horakuṭi reć duṕ yna, Oaḱko re jul tan Sengel Marsal’ć nel tana, gial-gopol tana, aagu-rakaṕ tana, ẽećoḱ habić. Nida-Nubaḱ re sabenaḱ talom yn tayom. Hoojinivt́ Horasesa’ć uṛuḱ urum tana, Jinivt́ tabu en jul Sengel leka ge gial-gopola, ẽećoḱa onḍoḱ. Menen tanać, «Iam-Muyuḱ te cimin’ń cirt́jiv caba akana! Gonoć do saben’bu talae ge; nen bageèskar akan Doḍa reó, Cirt́jiv atombage ket́ić doć horaan gea Goćbanaṅ jóṅ.»

Evnakanić kaji ket́a, «Hasaùpan sabenkoaḱ Jinivt́ nen Otesai re balaeana, Hasu misa akana. Unduṕ akanko Gonoć aeteko ocorduḱn Hora ge banoḱ te; Haam yn aete Gonoća; Jivt́ankoaḱ do nekaà Taesen. Mata akan Jó, Iuḱ ge borotangi leka, Unduṕ yn re Hasaùpan saben Gonoć geko borotangia. Kunkal bai Celaṅ-Caṭu raput́ te mucat́ok leka gea Hasaùpankoaḱ Jinivt́ do. Huḍiṅ-Maraṅ banar, Sẽaringa-Sẽasumuki banar, Gonoć teko guroḱa; Gonoć ge Gusĩa do.

«Goć talom yn te Jinivt́ at́ ket́ko, Apu Hon kać duḱnam daivaiya, Haga Haga ká. Alaca riiṅoḱ! Hagako nel tan arit́ tan aete, ikir Kuam teko iam tan geraṅ tan aete, miat́ tayom miat́ Hasaùpanko atkiroḱ tana, Karsa te ayar idioḱ Haḍako leka. Otesai do Gonoć-Soya te naṕ akana, Sẽaankô enate kako iama, Otesai reaḱ Sarinet́ urum keet́.

«Kusut́ teó Iam teó Jiv re Sayar do ká namoḱa; enasirkat́, Hasu lahḱoḱa Homoo tenoḱa. Rua-usuḱoḱ reó, Goćakanko amaḱ Iam te kako duḱnamoḱa. Sayar nam tanić do Iam„ Ranaḱ„ Jivhambal reaḱ Sar’ć tavć tut́e enaṅ. Nen Sar tut́ keet́, hapasenger ynić Jiv re Sayar boloa; Muyuḱ-Mirluṅ suba ketić ge Muyuḱ-Mirluṅ aeteć raaoḱa.»