1284 sirma re Hamelin re miat́ esu taṅan lekan hooć hućoḱ beṭa lena. Enić do kilimili net́ann, palat́-pilit́ Lijaḱ reaḱ Coat eć horoḱ akat́ taekena, enate enić do Birla-balaṅ OroṅRutu (Pied Piper) ko metat́ića. Enić do ‘Kaṭea Saáṕnić ań’ -menteć kaji ket́a, anḍoḱ chiminaṅ Puisa te en City ren saben Kaṭea anḍoḱ Chunṭila koń har enḍaḱkoa mente Kajić em ket́a. City renko miat́ Agreement kô bai ket́a, chiminaṅ Puisa emać reaḱ Kajikô em ket́a. Kaṭea Saáṕnić aćaḱ Kuchu aete miat́ huḍiṅ lekan Rutuć olt́ ket́a anḍoḱć oroṅ eṭeć ket́a. Kaṭea anḍoḱ Chunṭila ko saben Oaḱ-Oaḱ aete olt́ taṕ ean te enić taḱkô jumur hunḍi eana. Saben Kaṭea ko hućoḱ chaba eana lekać ada ket́ re enić Weser Gaḍa taḱć ayar idi ket́koa, entaḱ re aćaḱ Lijaḱć gapuć rakaṕ ket́a anḍoḱ Daḱ reć bolo eana. Janwar ko saben enićkô otoṅ eana, Daḱ rekô iuḱ eana anḍoḱkô sur goć eana.
City ren hoo ko nahḱ Mari aetekô har duḱ ean do, imin rená Puisa emaić reaḱ Kaji ká emat́ić re bugi eana honaṅkô men ket́a, saben leka hananena kee te enić do Puisa kakô emat́ića. Tayom do enić Kusur anḍoḱ Rakiń teć senoḱ bageat́koa. Enić tayom 26 June, Saint John anḍoḱ Saint Paul Poroṕ musiṅg, Setaḱ 7 (chiminaṅkô menèa, Tarasingi) reć hućoḱ ruaa lena, nen dau do Saángarnić lekać lijaḱ lena, Met́ Mua ko boro geć neloḱ taekena, Bohḱ re taṅan lekan araḱ Ṭopi taekena tać. Hora Haṭia re aćaḱ Rutuć oroṅ ket́a, nen dau mendo Kaṭea Chunṭila ko do ká, Hon ko: upun sirma aete chetan sange rená Koahon Kuihon ko. Ako tala re Mayor aḱ maraṅ akan Hapanum óć taekena. En Gadél renko do enićkô otoṅ ket́ića, anḍoḱ ać enko miat́ Buru teć ayar ket́koa, entaḱ re enko loḱ geć nel at́ eana.
Nena saben do miat́ Honhorhoèra nel ket́a, ać do miat́ Hon hebe akaać te esu sangin aete enkoć panja let́koa, ać ge tayom do biur ruaa ean te nen Kaji Town renko taḱ teć idi ket́a. Hakul-bakul chaba akan Enga-Apu ko sange-sange te Hon ko nam te City Gate ko paakô nir idi ket́a. Enga ko Duku tekô raḱ iam tana. Honùḍi bitar re Daḱ te, Ote te saben Muli Dutam kokô kul ket́koa, en Hon ko --chi miat́ Hon reóć-- nel ean redo chi mente kuúli te, enako sabenaḱ mendo sama ge senoḱ eana.
Saben re Tíhisidṍsi Hon ko at́ eana. Okon ko menèa, barea do, tayom ean tekin ruaa lena. Enkin re miat́ doć kãṛa lena anḍoḱ miat́ do Kalakonda. Kãṛahon do sen len taḱ kać uduṕ daeat́ reó, cheleka te enko Rutuòroṅnić ko otoṅ ket́ica, ena doć kaji daeat́a. Kalakondahon do jahnaḱ ó kać ayum let́ reó ako sen len taḱć uduṕ daeat́a. Miat́ huḍiṅ Koahon do sama sutui akan te eṭaḱ Hon ko loḱć sen lena, aćaḱ Jacket idi tóra menteć biur ruaa eana, anḍoḱć senoḱ ruaa len do eṭaḱ Hon ko Buru ren Lata rekô bolo at́ sekaa len taekana, enkate enić Tragedy aeteć atom eana. Nen Lata do nahḱ ó neloḱa.
18aḱ Century tala paa jóṅ do, anḍoḱ nahḱ ó ge toraṅ, en Hon ko City Gate paa tekô ayar olt́ len Hora do, en Hora re jah lekan Susun Rú-Oroṅ ká hoba irioḱ taeken te bunge-lose (Damabaṅaḱ, Saḍibaṅaḱ, hapa) Horakô metaḱa. Sarite, Ãandi re hoo ko Êra loḱ Church tekô senoḱ re nen Hora paromê tan do Rú Oroṅkô hoka lee te hoban taekena. Hamelin japaḱ re Hon ko at́ ean en Buru do Poppenberg kô metaḱa. Entaḱ re Cross leka bai akan barea Diri bit́ akana, miat́ do Etom paa anḍoḱ miat́ do Lenga paa re. Okoć okoć dokô menèa, Hon ko Lata bitar tekô ayar idi lena, anḍoḱ enko do Transylvania rekô olt́ eana.
Hamelin City renko nen Event akoaḱ City Registry rekô ol ket́a, anḍoḱ akoaḱ saben Ḍakara ko re Date do akoaḱ Hon ko at́ len Musiṅg aete parom akan singi sirma tekô leka idi ket́a.
Seyfried aḱ Kaji lekate City Registry re 26 do ká 22 June ol akana.
Town Hall Ginil re neleka roḱ akana:
Yesumasi unduṕ len aete 1284 sirma tayom
Hamelin aetekô ayar at́ eana
Nentaḱ re unduṕ len Tíhisidṍsi Hon ko
Miat́ Rutuòroṅnić Buru teć ayar idi ket́koa.
Anḍoḱ, nama Gate re roḱ lena: "Centum ter denos cum magus ab urbe puellos duxerat ante annos CCLXXII condita porta fuit."
[Nen Gate do en Magician City aete 130 Hon koć ayar ket́kô 272 sirma tayom bai akana.]
1572 sirma re Mayor do en Story Church reaḱ Window koreć uduṕ ichi let́a. Ena loḱ ol lenaḱ ko do káùrumdaeoḱ leka rika akana. Anḍoḱ do, nen Event uḍuḱ rikaè lagit́ miat́ Coin ó ko mint let́a.
(Jakob anḍoḱ Wilhelm Grimm tekin ol akat́aḱ)
Comments
Post a Comment