Biṅ chi Kaṭaana?

Chín Disum reaḱ Bankuṛi: 

Esu ayar reaḱ Kaji. Chiminaṅ hoo ko taekena, miat́ Chaṭu re Arkikô nam agu let́a okonaete. En Chaṭu re Arki do esu huḍiṅ ge taekena, hoo ko mendo sangea. Neleka re okoćbu nú irića Arki do? Uṛuḱ ket́a ko esu gáṛi, enreó Kaji ká bai eana. Enko tala ren miat́ hoo men ket́a 'abu saben hoo ko Ote re Jaṭa te miat́ Biṅbu bai gárića, okoć ayar utar bai sekaaća, nen Arki do ać gebu emaà. Saben hoo ko é ket́a. 

Ente saben hoo Jaṭa mipiat́ nam joṅ ken te saben ge Biṅ ko bai gár eana. Miat́ hoo esu anjaa ge Biṅeć bai sekaa ket́ića, ente Chaṭu hambut́ kee te hoo koć metat́koa, "Ape do imin rená mãe-mãe tepe gárić tana, ań ma sekaa ean gea. Nelepe, nen Biṅaḱ Kaṭa koóń gár daea." Kaji ket́ chi en hoo Jaṭa te Biṅaḱ Kaṭa koóć gár eana.

En loḱ do eṭaḱnić miat́ hoo Biṅeć gár sekaa ket́ića, ayar hoo hambut́ let́ Chaṭu doć reć ket́ić teć men ket́a: "Okon Disum re Biṅ dokô Kaṭaana? Am gár akat́ Biṅ do gelea lekać Kaṭaana, neić Biṅ do káa. Ente, ayar utar sari ten Biṅ gár sekaa kenić do ań, am ká, nen Arki do ań núêa."

Ente, Chín re jahć ge chiminaṅ paeṭiê teaḱ menaḱa, sama sama re ena aeteó lhà ko paeṭiêa, enkan Paeṭi dokô metaḱa, Biṅ gár ket́ić te Kaṭa gár Paeṭi.