Konje Disum lagit́ Etom Hora saṕ

Hora re miat́ Sadom Gaḍi nir hućoḱ taekena, maraṅ onḍoḱ salangi, apea Sadom ko or tat́a. Gaḍi chetan miat́ hoo duṕ akana, anḍoḱ ayar paa re Hartanić duṕ lena. Gaḍi do esu ã́chać har let́a, apir idinn tan leka. Chanaṕ paa re miat́ maraṅ Box ladi lena. 

Hora Kuṭi re sen akat́ miat́ haam hoo nel ketić teć iuaić tana: "Chia, okon paa te?"

Sadom Gaḍi mae-mae te tingu eana, duṕ len hoo men ket́a: "Aliṅ  do Chú ko Disum senoḱ teaḱ menaḱa." 

Nen Kaji ayum ket́ chi haam hoo keṭeć teć landa ket́a, men ket́ać: "Chú ko Disum do etom Jana rea, konje paa teben har idiè re do beṭaoḱa ate?"

 

 "Ò, chekate kaliṅ  beṭaèa, kaben nelè tana? Apea Sadom ko or akat́liṅa, maraṅ ókô maraṅa; salangi ókô salaṅgia. Nir kee re Hoyo chenaḱ Sadom chenaḱ?", Gaḍi re duṕ len hoo nelekać kaji uraa ket́a. 

Ham hoo bugi teć kajiaić tana: "Abenaḱ Sadom ko maraṅ salangi gea sari. Mendo eṭaḱ muli teben har idiè re Chú ko Disum ká beṭa daeoḱa." 

Gaḍi chetan duṕ len hoo Gaḍi chanaṕ paa re em len en Box chunḍul kee teć kaji ket́a: "Nen Box re esu pereć ken Ṭaka menaḱa, Chú ko Disum doliṅ  beṭaè gea." 

Ham hoo ayum kaji teć laga eana, men ket́ać: "Ṭaka do Gomke menaḱ gea aben taḱ. Beṭan Hora te kaben senè do kaben beṭaè gea, sen idiè sen idiè eṭaḱ Disum reben at́ saniṅena." 

 

"Neić, Hartanić, homoo koć keṭeća, neić leka Sadom har adaan ko goṭa Disum re baṅkoa. Jeta Mulieć harè Chú ko Disum doć har beṭaè gea." Nimin kaji sekaa keet́ chetan duṕ len hoo ayar paa ren hooć iṅgulaić tana. Ayar paa renić haasa ket́ koać Sadom ko, Sadom Gaḍi mae-mae te ã́cha idinn eana, mae-mae te saniṅ idinn eana, ká neloḱ leka.

(Chín Disum reaḱ Bankuṛi)